1 сентябрьдән вакыты чыккан товар саткан кибетләргә автомат рәвештә штраф салыначак

Бу хакта РИА Новости агентлыгына Перспектив технологияләр үсеше үзәге (ЦРПТ) директорлар советы рәисе Михаил Дубин хәбәр иткән.

Яңа тәртип буенча, система кассада яраклылык вакыты чыккан товарны сату омтылышын автомат рәвештә теркәячәк. Аннары хокук бозу турында карар проекты әзерләнеп, контроль органына җибәреләчәк. Имзаланганнан соң документ «Госуслуги» порталындагы хокук бозучы оешманың шәхси кабинетында пәйда булачак, шуннан соң штраф рәсмиләштереләчәк.

Михаил Дубин сүзләренчә, беренче чиратта яңа механизм яраклылык вакыты булган азык-төлек продукциясенә кагылачак. Соңрак ул маркировкаланучы башка төр товарларга да кулланылачак.

Автомат штрафлар механизмы юл хәрәкәте кагыйдәләрен бозган өчен камералар ярдәмендә штраф салу принцибы буенча эшләячәк.

Моннан тыш, Росздравнадзор әлеге системаны дарулар әйләнешенә дә кертү тәкъдиме белән чыккан. Дубин билгеләп үткәнчә, дәүләт мондый карар кабул иткән очракта, «Гадел билге» («Честный знак») маркировкасы системасы моны техник яктан тәэмин итәргә әзер.

Исегезгә төшерәбез, вакыты чыккан маркировкалы товарларны автомат рәвештә ачыклау һәм штраф салу механизмын әзерләү турында узган ел ук хәбәр ителгән иде.