12 меңнән артык кысла тотканнар

Хокук бозуларга юл куймау өчен Гадәттән тыш хәлләр министрлыгы, биоресурслар буенча дәүләт комитеты, Роспотребнадзор хезмәткәрләреннән уртак төркемнәр оештырылды. Операция нәтиҗәләре буенча республика сулыкларыннан законсыз урнаштырылган 1 мең 678  ятмә алынган, бу 35 миллион сумлык зыяннан саклап калган. 865 кеше административ җаваплылыкка тартылган. 28 җинаять эше кузгатылган. Россия җинаять кодексының 256 маддәсе буенча хокук бозучыларга 500 мең сумга кадәр штраф, яки 2 елга кадәр иректән мәхрүм итү яный. 

– “Нерест” операциясе вакытында сәнәгать балыкчылыгы тыела. Балыкчыларга ярдан бер генә кармак белән балык тотарга рөхсәт ителә. Кармакка ике ыргак кую гына рөхсәт, – дип аңлатты Татарстан биоресурслар буенча дәүләт комитеты җитәкчесе урынбасары Радик Мутахаров.

Комитет мәгълүматлары буенча законсыз балык тоту турындагы хокук  бозуларның төп очраклары Спас, Баулы, Мамадыш, Алексеевск, Тукай, Аксубай, Яшел Үзән, Түбән Кама, Тәтеш, Кукмара, Чистай, Минзәлә, Әгерҗе районнарында теркәлгән. Шулай да бер районны да аерып әйтеп булмый, чөнки хокук бозучылар елга яры буенча уңайлы урыннарда да, суда да эш итә. 

22 май көнне Лаеш районының Тәтәй торак пунктыннан көньяктарак Куйбышев сусаклагычында дәүләт комитеты хезмәткәрләре законсыз рәвештә 42 балыкны тоткан кешене тоткарлаганнар. Балыкчы “Прогресс” көймәсендә җептән ятьмә белән балык тоткан. Көймәсе “Прогресс” булса да, кеше табигатькә 39 мең 700 сумлык зыян саласы булган. Рейд кысаларында балык тоту җайланмалары алынган. Хокук сакчылары җинаять эше кузгату мәсьәләсен хәл итә. 

Түбән Кама сусаклагычында 12 меңнән артык кысла тоткан кешеләрне дә кулга алганнар. Барлык кыслаларны кире сусаклагычка чыгарганнар. Экологик системаны 1 миллион 400 мең сумга якын зыяннан саклап калганнар. Хокук бозучыларны тотсалар да, аларның саны кимеми. “Нерест” операциясенең соңгы көнендә «Агыйдел елгасы дельтасы» тыюлыгында 445 кысла тоткан ике кеше тоткарланган. 

Шулай ук, “Балык булсын” акциясе кысаларында Куйбышев һәм Түбән Кама сусаклагычларында 27 километрга якын уылдык чәчү урыннары урнаштырылган.