2025 елда Татарстанда 18 меңнән артык гаилә ана капиталына сертификат алган

Бу хакта ТР Хезмәт министрлыгы матбугат хезмәте хәбәр итә.

Россия Социаль фондының төбәк бүлеге мәгълүматлары буенча, акчаларның күп өлеше торак шартларын яхшыртуга юнәлдерелгән. 5 меңгә якын гаилә ана капиталын кредитлар җәлеп итмичә торак сатып алу өчен файдаланган, тагын 24 мең сертификат банк кредитларын һәм займнарын каплауга юнәлдерелгән.

14 мең гаилә әлеге акчаны балаларның белем алуына тоткан. Моннан тыш, 10 мең сумга кадәр калган акчаны 1,2 мең гаилә алган.

2025 елда беренче балага ана капиталы күләме 690 266,95 сум тәшкил итә. Икенче бала туганда 221 895,14 сум өстәмә түләү каралган. Әгәр ана капиталына хокук элек рәсмиләштерелмәгән булса, гаилә 912 162,09 сум күләмендә бер тапкыр бирелә торган түләү алырга мөмкин.

Ана капиталы программасы 2030 елга кадәр «Гаилә» милли проекты кысаларында эшли, ул Россия гаиләләренә ярдәм итүгә һәм аларның тормыш дәрәҗәсен күтәрүгә юнәлдерелгән.