2026 елда Татарстанда тагын өч «акыллы» спорт мәйданчыгы төзеләчәк

2026 елда Казанда, Түбән Камада һәм Бөгелмәдә өч спорт мәйданчыгы барлыкка киләчәк. Бу хакта республиканың Спорт министрлыгы матбугат хезмәтендә хәбәр иттеләр.

Проект 2022 елда Казанда (Мусин һәм Имәнлек урамнарында) һәм Әлмәттә мәйданчыклар ачудан башланды. 2023 елда «акыллы» мәйданчыклар Түбән Камада, 2025 елда Яшел Үзәндә барлыкка килде. Агымдагы елда программаны тормышка ашыру дәвам иттерелә: мәйданчыклар өч муниципаль берәмлектә төзелә, ә Казанда кышкы вариант – хоккей бортлары булган мәйданчык сафка бастырыла.

Муниципалитетлар өчен ике типтагы җиһазлар җыелмасы бар. Беренче җыелма – 32×19 метрлы универсаль мәйданчык, ул футбол, баскетбол һәм волейбол уйнау өчен туры килә. Монда турниклар һәм борыслар белән воркаут зонасы (инвалид кешеләр өчен дә җиһазлар бар), тренажерлар, шулай ук 25 урынлы трибуна бар.

Икенче җыелма – универсаль түшәмәле, 20×40 метрлы күпфункцияле мәйданчык. Ул 20×12,1 метрлы воркаут зонасы, саклагыч челтәрле хоккей бортлары, хоккей өчен ике пар капка. Дүрт баскетбол стойкасы һәм ике пар футбол капкасы белән җиһазландырылган. Мәйданчыкта көч таләп ителә торган тренировкалар өчен тренажерларның тулы җыелмасы да урнаштырылган.

«Акыллы» мәйданчыкларның төп үзенчәлеге – интерактивлык. Һәр тренажерда QR-код бар. Аны смартфон аша укып, кулланучы күнегүләрне башкару техникасы буенча тәфсилле видеоинструкция карый һәм шәхси киңәшләр ала. Уңайлылык өчен мәйданчыкларга Wi-Fi куела. Җиһазларның бер өлеше сәламәтлек мөмкинлекләре чикле кешеләр өчен яраклаштырылган.

Проектның төп максаты – халыкта актив һәм сәламәте яшәү рәвешенә кызыксыну уяту, шулай ук гаилә өчен файдалы ял оештыру.