2027 елдан пенсияләр һәм түләүләр артачак: кемнәрне нинди үзгәрешләр көтә?

Бу хакта Дәүләт Думасының бюджет һәм салымнар комитеты әгъзасы Никита Чаплин хәбәр иткән.

Иминият пенсияләре – ике этапта

2027 елда иминият пенсияләре ике тапкыр артачак:

• 1 февральдән – 2026 елдагы фактик инфляция күләменә;

• 1 апрельдән – Социаль фонд керемнәрен исәпкә алып өстәмә индексация үткәреләчәк.

Социаль пенсияләр

Социаль пенсияләр һәм башка социаль түләүләр 1 апрельдән пенсионерның яшәү минимумы үсеше нигезендә индексацияләнәчәк.

Эшләүче пенсионерларга – августта яңадан исәпләү

Эшләүче пенсионерлар өчен 1 августтан пенсия автомат рәвештә яңадан исәпләнәчәк. Моның өчен гариза язарга кирәкми. Әмма өстәмә арттыру өч пенсия коэффициентыннан артмаячак.

Хәрби пенсионерлар

Хәрби пенсияләрне планлы индексацияләү 2027 елның октябренә билгеләнгән.

Моннан тыш, элеккеге очучылар һәм шахтерлар кебек аерым ташламалы категорияләр өчен өстәмә түләүләр ел дәвамында дүрт тапкыр яңадан каралачак.

Ана капиталы да арта

1 февральдән ана капиталы һәм күпчелек социаль пособиеләр дә индексацияләнәчәк. Арту күләме 2026 елдагы фактик инфляциягә бәйле булачак, шуңа күрә төгәл саннар соңрак билгеле булачак.

Хәзерге исәпләүләр буенча:

• беренче балага ана капиталы – якынча 729 мең сум;

• икенче бала туганда өстәмә түләү – 234 мең сум;

• әгәр гаилә моңа кадәр ана капиталын алмаган булса, икенче балага гомуми сумма 963 мең сум тәшкил итәчәк.

Депутат сүзләренчә, 2027 елга каралган барлык индексацияләрнең төгәл параметрлары 2026 елның көзендә кабул ителәчәк Социаль фонд бюджеты турында законда расланачак.