25 ел мәктәптә эшләгән укытучыларга — яңа мөмкинлек

Президент Владимир Путин имзалаган указ нигезендә, мәктәпкә беренче тапкыр килгән яшь педагоглар ялгыз калмаячак — аларга кимендә бер ел дәвамында тәҗрибәле остаз ярдәм итәчәк.

Яңа укытучылар өчен тагын бер мөһим яңалык — хезмәт хокуклары һәм һөнәри мәсьәләләр буенча түләүсез юридик ярдәм алу мөмкинлеге.

Ә инде 25 елдан артык педагогик стажы булган укытучыларга «хезмәт ветераны» исемен алу мөмкинлеге биреләчәк.

Моннан тыш, педагоглар: дәүләт электрон белем бирү ресурсларын бушлай куллана алачак;  музейларга бушлай йөрү мөмкинлегенә ия булачак;  укытучы һөнәренең җәмгыятьтәге аерым әһәмияте рәсми рәвештә танылачак.

Белгечләр фикеренчә, мондый чараларның төп максаты — яшьләрне мәктәпкә җәлеп итү, тәҗрибәле педагогларны саклап калу һәм укытучы һөнәренең абруен күтәрү.