5 яшьлек кызның фаҗигале үлеме: әтисе күз алдында су астына киткән баласын коткара алмаган

Бала Татар Мөшегесе авылы янындагы буада әти-әнисе  белән ял иткән вакытта батып үлгән.

Россия Тикшерү комитетының Татарстан буенча идарәсе мәгълүматларына караганда, кызчык кабартылган түгәрәк белән суда йөзгән. Әмма бер мизгелдә түгәрәк капланып киткән һәм бала су астына киткән.

Әтисе шунда ук кызын эзләп су астына чумган, ләкин аны коткарып кала алмаган. Соңрак коткаручылар сабыйның гәүдәсен ярдан 15 метр ераклыкта, ике метр тирәнлектән тапкан.

Фаҗига турында хәбәр 16:05 сәгатьтә килгән. Баланың гәүдәсен судан 17:00 сәгатьтә чыгарганнар. Гадәттән тыш хәлләр министрлыгында бу урынның коену өчен җиһазландырылмаган булуын искәртә. Ведомство мәгълүматлары буенча, фаҗиганең төп сәбәбе — суда иминлек кагыйдәләрен бозу.

Әлеге вакыйга буенча Татарстан прокуратурасы тикшерү башлады. Шулай ук Россия Тикшерү комитеты саксызлык аркасында үлемгә китерү маддәсе буенча җинаять эше кузгатты. Тикшерүчеләр фаҗиганең барлык шартларын ачыклый.

Бу тетрәндергеч вакыйга тагын бер кат искәртә: хәтта әти-әнисе күзәтүе астында да кабартылган түгәрәкләр һәм башка йөзү чаралары балалар өчен тулысы белән иминлек  гарантиясе түгел. Берничә секундка игътибарны читкә юнәлтү дә гомерлек йөрәк ярасына китерергә мөмкин