500 мең сум күләмендәге “Ата капиталы” гаиләләргә ярдәм итәрме?

Шундый төр инициатива белән Дәүләт Думасы вице-спикеры Борис Чернышов чыккан. 

Яңа проект нигезендә, икенче һәм аннан соңгы бала туганда әтиләргә 500 мең сум түләү кертү тәкъдим ителә. Әмма акчаны алу өчен мөһим шарт бар: әти кеше бала тәрбиясендә турыдан-туры катнашырга тиеш. Мәсәлән, бу бала карау буенча рәсми отпуск алу белән расланырга мөмкин.

Шул ук вакытта, бизнес өлкәсендә эшләүче эксперт Кирилл Селезнев бу чараның нәтиҗәлелегенә шик белдерә. Аның сүзләренчә, 500 мең сум — ярыйсы сумма, ләкин ул нибары 4–6 айлык хезмәт хакын гына каплый һәм гаиләнең тормышында сизелерлек үзгәреш ясамый.

Белгеч фикеренчә, мондый түләүләр бала табуны арттыруга әллә ни йогынты ясамаячак. Моннан тыш, дәүләт өчен бу бик кыйммәткә төшәргә мөмкин: ел саен Россиядә якынча 1,2 миллион бала туа, димәк, программаны гамәлгә ашыру өчен йөзләрчә миллиард сум кирәк булачак.
Селезнев альтернатив чараларны нәтиҗәлерәк дип саный. Аның фикеренчә, гаиләләргә торак шартларын яхшырту яки балалар бакчалары (яслеләр) белән тәэмин итү күпкә зуррак нәтиҗә бирер иде.

Шулай ук ул Европа тәҗрибәсе мисал итеп китерелә: анда «әти ялы» киң таралган, әмма ул акча түләүдән бигрәк, әти-әниләр арасында җаваплылыкны бүлешүгә юнәлтелгән.

Белгечләр ассызыклаганча, Россиядә хәзерге вакытта әтиләр балалар белән көненә нибары берничә минут кына вакытын үткәрә, һәм бу проблеманы акча түләү белән генә хәл итеп булмый.

Билгеле булганча, «Яшәү өчен инфраструктура» илкүләм проекты гамәлгә ашырыла.