8 июльдә Казанда 100дән артык пар никахлаша: Гаилә көне программасы билгеле булды

8 июльдә Казанда Гаилә, мәхәббәт һәм тугрылык көне киң колач белән билгеләп үтеләчәк. Бу көнне шәһәрдә 100дән артык пар рәсми рәвештә гаилә корачак, ә казанлыларны һәм шәһәр кунакларын мастер-класслар, бәйрәм чаралары, яшь гаиләләрне һәм күп балалы парларны хөрмәтләү тантаналары көтә.

8 июльдә Казанда Гаилә, мәхәббәт һәм тугрылык көненә багышланган бәйрәм чаралары узачак.

Бәйрәм Кирилл чиркәве янында башлана. Биредә Изге Петр һәм Феврония һәйкәленә чәчәкләр салу тантанасы һәм тәре йөреше оештырыла. Храм территориясендә кунаклар өчен мастер-класслар, ярминкә, күңел ачу программасы, шулай ук күп балалы гаиләләрне хөрмәтләү чарасы үткәреләчәк.

Шул ук көнне 7 нче шәһәр клиник хастаханәсенең перинаталь үзәгендә булачак әти-әниләр өчен ачык ишекләр көне узачак. Алар бала тудыру йортын карап чыга, табибларга сорауларын бирә һәм сабый тууны дәүләт теркәве тәртибе белән таныша алачак.

Гаилә бәйрәме кысаларында Васильченко скверында һәм Татарстан Милли музеенда озак еллар иңне-иңгә куеп яшәгән парларны бүләкләү тантаналары үтәчәк.

Бәйрәмнең иң истәлекле вакыйгаларының берсе 100дән артык парның нәкъ менә 8 июльдә никахларын рәсмиләштерүе булачак.

Казан мэры Илсур Метшин билгеләп үткәнчә, гаилә – җәмгыятьнең иң төп кыйммәтләренең берсе.

– Гаиләдә кеше ярдәм, мәхәббәт таба, көч һәм энергия ала. Гаилә кору белән тормыш бөтенләй башка төсмер ала, ә бала туу бәхетне тагын да арттыра. Моннан да кадерлерәк нәрсә юк, – диде шәһәр башлыгы.