Җәйгә куркынычсыз ябыгу ысуллары: суны күбрәк эч һәм җитәрлек йокла

Бу хакта КФУга караган университет клиникасының Үсеш, сыйфат һәм цифрлы медицина буенча баш табиб урынбасары, КФУның Фундаменталь медицина һәм биология институты доценты Иван Киясов белдерә. Аның әйтүенчә, берничә ай эчендә иркен режимда 2–7 килограммга кадәр, хәтта аннан да күбрәк ябыгырга мөмкин. Әмма нәтиҗә кешенең башлангыч халәтенә бәйле.

- Артык авырлык никадәр күбрәк булса, нәтиҗә дә шулкадәр сизелерлек була. Әгәр гомумән, тышкы кыяфәтегезгә артык шелтәләр юк икән, әмма җәйгә бераз гына формаларыгызны яхшыртырга телисез икән, үлчәү күрсәткечләренә түгел, ә көзгегә карау дөресрәк, – ди белгеч.

Иван Киясов фикеренчә, диетага утырганчы, иң элек тормыш ритмын тәртипкә китерергә кирәк. Бу – төп нигез.

- Йокы, хәрәкәт, туклануның даимилеге бик әһәмиятле. Әгәр матур, спортчан фигура телисез икән, даими физик активлык та кирәк, – ди ул.
Белгеч киңәш иткәнчә, күбрәк су эчәргә, яхшы йокларга, мөмкин кадәр саф һавада актив хәрәкәт итәргә кирәк. Моннан тыш, тоз һәм шикәр куллануны киметү, ризыкта аксым белән клетчатканың тиешле күләмен саклау мөһим. Ябыгу процессын да күңелле һәм кызыклы итәргә тырышырга кирәк. Туклану табигый һәм файдалы булырга тиеш.

- Ашамлыкларның составына игътибар итегез: аксымнар, майлар, углеводлар баланста булсын, калорияләр артык булмасын. Аш тәмле булырга тиеш. Кирәк булса, нутрициолог, ә сәламәтлек проблемалары булганда диетолог ярдәменнән файдаланырга мөмкин. Физик активлык өчен тренер киңәше дә урынлы. Әмма тормыш ритмын көйләү – һәркемнең үз кулында, – дип йомгаклый белгеч.

Билгеле булганча, Татарстанда «Сәламәтлек технологиясе» илкүләм проекты гамәлгә ашырыла.