Алинә Заһитова: «Мондый сүзләрне ишетү сәер, бу – акылсызлык»

Бу хакта «РИА Новости» яза.

Фигуристка хезмәттәшенең сүзләрен «акылсызлык» дип атаган һәм үзенең спорт тәҗрибәсе яшь спортчылар белән эшләү өчен җитәрлек булуын ассызыклаган.

Моңа кадәр Иван Ригини социаль челтәрдә Заһитова исемендәге фигуралы шуу үзәге турында язма астында комментарий калдырып, Алинәнең тренер булып эшләү өчен тәҗрибәсе җитмәвен әйткән иде. Аның фикеренчә, кыска спорт карьерасы булган кеше балаларны өйрәтергә тиеш түгел, ә төп эшне тәҗрибәле тренерлар башкарырга тиеш.

Бу сүзләргә җавап итеп Заһитова үзенең социаль челтәрендә болай дип язган:

«Без кайчандыр яхшы аралашкан хезмәттәштән, өстәвенә ир-аттан, мондый сүзләрне ишетү сәер. Кешене җәмәгать алдында кимсетергә тырышу – профессионаллык түгел, ә икейөзлелек. Кыска вакытлы карьера булганга күрә мин беркемне дә өйрәтә алмаячакмын дип әйтү, йомшак итеп әйткәндә, акылсызлык. Иң мөһиме – сан түгел, ә сыйфат. Мин дөньяның иң көчле тренерлар штабы белән эшләдем, бу миңа зур тәҗрибә һәм ныклы нигез бирде. Артымда еллар буе хезмәт, зур титуллар һәм спортны тирәнтен аңлау тора. Нәкъ менә шул тәҗрибәне яшь буынга тапшырырга телим».

Исегезгә төшерәбез, Казанда Алинә Заһитова исемендәге фигуралы шуу үзәге төзелеп бетү алдында. Объектны быел 1 сентябрьдә ачу планлаштырыла. Шул ук көнне яшь спортчылар өчен беренче күнегүләр дә башланачак.

24 яшьлек Алинә Заһитова – 2018 елгы Олимпия чемпионы, Европа һәм дөнья чемпионы. Соңгы елларда ул яшь фигуристларны үстерүгә һәм үзенең спорт мәктәбен булдыруга зур игътибар бирә.