Ана капиталын тотуның иң популяр максаты аталды

Программа эшли башлаганнан бирле Татарстанда 427 меңнән артык гаилә ана капиталына сертификатлар рәсмиләштергән, ә 400 мең гаилә бу акчаларны кулланган инде. Бу хакта «Татар-информ» га биргән интервьюсында Россия Социаль фондының Татарстан буенча бүлеге идарәчесе Эдуард Вафин сөйләгән.

"Иң популяр юнәлеш — торак шартларын яхшырту. Моннан 320 мең гаилә файдаланган. Шулай ук күпләр ул акчаларны балаларының белем алуына юнәлтә. Татарстанда андый гаиләләр 48 меңнән артык. Айлык түләүне сайлаучылар да бар-бу 27 мең гаилә", - дигән ул.

Моннан тыш, узган елдан сертификат счетында 10 мең сум яки аннан азрак акча калган гаиләләр бу сумманы бер мәртәбә алырга мөмкин. Әлеге мөмкинлектән 4 мең гаилә файдаланган инде.

Быел "Демография" милли проектына алмашка «гаилә» дип аталган яңа милли проекты барлыкка киләчәк. Ул үз эченә «гаиләгә ярдәм», «өлкән буын», «ана һәм балачакны саклау» кебек программаларны алачак.