Арча районына яңа җитәкче билгеләнде. Илшат Нуриев кая китә?

Татарстан Министрлар Кабинетының Баш ветеринария идарәсе җитәкчесе вазифасын биләгән Алмаз Хисаметдинов ТР Арча районы җитәкчесе итеп билгеләнде. Бу карар турында муниципалитет советы утырышында ТР Дәүләт Советы Рәисе Фәрит Мөхәммәтшин хәбәр итте.

«Бүген сессия гади түгел: район җитәкчелеге алмашына. Татарстан Рәисе Рөстәм Миңнеханов карары буенча Илшат Нуриевка яңа юнәлештә – Казан дәүләт аграр университетында эшләргә тәкъдим ителде. Мондый югары уку йорты өчен ректорны нәкъ менә шушыннан сайлап алулары район өчен горурлык. Ул 10 елдан артык муниципалитет белән грамоталы һәм актив җитәкчелек итте», - дип белдерде Мөхәммәтшин.

Яңа җитәкче кандидатурасы Совет тарафыннан бертавыштан хупланды.

«Арча районы миңа бик якын, Мин үзем күрше Балтач районыннан бит. Без бер-беребезне ишетеп кенә белмибез, моңа кадәр дә сезнең муниципалитет белән бик тыгыз элемтәдә булдык. Алга таба барлык бурычларга бергә ирешәчәкбез. Бөтен көчемне районны үстерүгә юнәлтергә вәгъдә итәм», - дип мөрәҗәгать итте депутатларга Хисаметдинов.

Утырышта Илшат Нуриев «Татарстан Республикасы алдындагы казанышлары өчен» ордены медале белән бүләкләнде. Аны ТР Дәүләт Советы Рәисе Фәрит Мөхәммәтшин муниципалитет советы утырышында тапшырды.

«Татарстан Рәисе Рөстәм Миңнеханов, Хөкүмәт һәм республика Дәүләт Советы исеменнән Илшат Нуриев Арча муниципаль районы башлыгы вазифасында актив һәм нәтиҗәле эше өчен бүләкләнә», – дип билгеләп үтте парламент җитәкчесе.