“Арзан чит ил машинасы”на кызыгып: Татарстанда хатын-кыз мошенникларга 3 миллион сум күчергән

Бу хакта Татарстан Республикасы буенча Эчке эшләр министрлыгы хәбәр итә.

Ирле-хатынлы автомобиль сатып алырга ниятләп, социаль челтәрдә чит илдән машиналар сайлау һәм китерү хезмәтләрен тәкъдим итүче төркемгә тап булалар. Беренче карашка ышанычлы күренгән аккаунтлар һәм автомобильләр турында видеолар аларда шик уятмый.

Шуннан соң “сатучылар” мессенджер аша хатын-кыз белән элемтәгә чыгып, килешү җибәргән һәм түләү өчен банк реквизитларын күрсәткән. Ышаныч тудырган схема нәтиҗәсендә зыян күрүче берничә транзакция аша төрле счетларга барлыгы 3 миллион 141 мең сум акча күчергән.

Акча алынгач, мошенниклар элемтәгә чыгудан туктаган, ә социаль челтәрдәге төркем юкка чыккан.

Әлеге факт буенча «мошенниклык» маддәсе нигезендә җинаять эше кузгатылган. Хәзерге вакытта тикшерү дәвам итә.