Балалар мәйданчыклары: һәр унынчысы имгәнү белән яный

Федерация Советы Рәисе Валентина Матвиенко белдергәнчә, бүген илдә һәр унынчы балалар уен мәйданчыгы ватылган җиһазлар аркасында сабыйлар тормышы һәм сәламәтлеге өчен реаль куркыныч тудыра. Өстәвенә, кайбер объектлар бөтенләй хуҗасыз хәлдә. – Сыйфатлы, заманча инфраструктурасыз торак – ул кулсыз чемодан кебек, бары тик квадрат метрлар гына, — дип ассызыклады сенатор. – Әгәр янәшәдә балалар бакчасы, мәктәп, поликлиника, куркынычсыз уен мәйданчыгы юк икән, яшь гаиләләр балалар табу турында йөз тапкыр уйлаячак. Һәм алар хаклы булачак. Матвиенко сүзләренчә, төбәкләр арасында аермалар булса да, ил күләмендәге картина борчулы. Кайбер тикшеренүләр күрсәткәнчә, уен мәйданчыкларының шактый өлеше искергән, таганнар ватылган, ә куркынычсызлык таләпләре үтәлми.

Мондый шартларда балалар өчен гади уен да хәвефле маҗарага әйләнә. Федерация Советы спикеры әлеге вәзгыятьне торак-коммуналь хуҗалыктагы гомуми проблемалар белән бәйләде. Аның фикеренчә, куркынычсыз һәм заманча инфраструктура булмаган йортлар яшь гаиләләр өчен үз кыйммәтен югалта. Шуңа күрә шәһәр мохитенең сыйфаты – демографиягә дә, тормыш дәрәҗәсенә дә турыдан-туры тәэсир итә торган фактор. Шул ук вакытта Матвиенко дәүләт күзәтчелеген кире кайтару тәкъдимнәренә карата да ачыклык кертте. Гамәлдәге законнар буенча, йорт яны мәйданчыкларын карап тоту өчен идарәче компанияләр җаваплы. Гамәлдәге ГОСТ таләпләре нигезендә, балалар уен мәйданчыклары даими визуаль һәм функциональ яктан тикшерелергә, ә елга кимендә бер тапкыр куркынычсызлыкка экспертиза үткәрелергә тиеш.

Әмма, күренгәнчә, әлеге таләпләр һәрвакыт та үтәлми. Сенатор шәһәр мохитен комплекслы рәвештә яңарту зарурлыгын да билгеләп үтте: коммуналь челтәрләрне ремонтлаудан алып парковкаларны тәртипкә китерүгә, балалар бакчалары һәм поликлиникаларны һәркем өчен уңайлы итүгә зур игътибар бирелергә тиеш. Аның сүзләренчә, балалы гаиләләр өчен чын-чынлап уңайлы инфраструктура булдыру торак-коммуналь хуҗалык өлкәсендә яңа алымнар, инновацияләр һәм нәтиҗәле финанслау системасын таләп итә.