Балалы гаиләләр өчен ипотека буенча яңа ташламалар тәкъдим иттеләр

Документта ташламалы ипотеканы 6 процентка кадәр ставка белән бирергә һәм мондый ипотека кредитының бер өлешен, әгәр заемщик яшь гаиләләр, күпбалалы гаиләләр һәм свода катнашучылар гаиләләре категориясенә керсә, бюджет акчалары белән түләргә тәкъдим ителә. 
Әйтик, яшь гаиләләргә беренче бала туганда яки уллыкка алганда кредит бурычының 10 процентын, икенче бала туганда 20 процентын каплау күздә тотыла.

Махсус хәрби операциядә катнашучыларның гаиләләренә бер бала булганда бирелгән кредит буенча бурыч суммасының 40 проценты һәм ике бала булса - 60 проценты капланачак.

Күпбалалы гаиләләргә, өч бала булган очракта, бурыч суммасының 75 проценты күләмендә һәм, дүрт һәм аннан да күбрәк балалары булганда, 100 проөент күләмендә кредит түләгәндә дәүләттән финанс ярдәме күрсәтү күздә тотыла.

Закон проекты авторы, Дәүләт Думасының гаиләне яклау, ата, ана һәм балачак мәсьәләләре комитеты рәисе Нина Останина билгеләп үткәнчә, хәзер яшь гаиләләрне торак белән тәэмин итүгә дәүләт ярдәме бар. Әмма бу чарада 2023 елда 131,5 мең яшь гаилә катнашкан, шул ук вакытта 2022 елда социаль түләүләрне 14,3 мең яшь гаилә генә алган. 

Закон проектына булган аңлатма язуында әйтелгәнчә, күп балалы гаиләләр өчен федераль дәрәҗәдә бердәм ярдәм комплексы формалаштырылмаган. 

СВОда катнашучыларның гаиләләре исә дәүләтнең һәрьяклап ярдәменә мохтаҗ, тәкъдим ителә торган чаралар мондый гаиләләрне яклауны көчәйтәчәк һәм аларның статусын күтәрәчәк, диелә аңлатма документларында.

Тулаем алганда, закон проекты балалы гаиләләрнең торак проблемаларын хәл итүгә федераль бюджеттан өстәмә акчалар җәлеп итәргә, аларның тормыш дәрәҗәсен күтәрергә һәм туучылар санын стимуллаштырырга тиеш. Кабул ителгән очракта закон 2026 елдан үз көченә керер дип көтелә.