«Баланы аякка бастыру» ның күпме торганы билгеле булды

Баланы аякка бастыру өчен россиялеләргә 1,2 млн сумнан 3,6 млн сумга кадәр сумма кирәк, дип сөйләгән "Газета.Ru" басмасына икътисад фәннәре кандидаты, Халыкара икътисадый элемтәләр институтының икътисад һәм идарә кафедрасы доценты Люза Байгузина.

"Бала тәрбияләү бәясен без туудан алып югары уку йортын тәмамлаганчыга кадәр шартлы рәвештә алабыз. Беренче елларда (0-3 ел) туклануга, кием-салымга, уенчыкларга, медицина чыгымнарына якынча 200-400 мең сум кирәк. Мәктәпкәчә учреждениеләр, өстәмә дәресләр, кием-салым якынча 300-500 мең сум таләп итәчәк", - дигән Байгузина.

6 яшьтән алып 17 яшькә кадәрге укучыларны укыту, төрле түгәрәкләргә йөртү өчен 800 меңгә якын— 1,2 млн сум, ә югары белем алу өчен — 400 меңнән алып 1,5 млн сумга кадәр акча кирәк.

2025 елның 1 февраленнән Россиядә ана капиталы 9,5% ка индексацияләнгән һәм 690 266,95 сум тәшкил итә — беренче балага (әгәр ул 2020 елның 1 гыйнварыннан туган яки уллыкка алынган булса). Икенче балага 912 162,09 сум (әгәр элек ана капиталы беренче балага алынмаган булса) һәм 221 895,10 сум (икенче бала өчен өстәмә түләү, әгәр элегрәк ана капиталы беренче балага рәсмиләштерелгән булса) түлиләр.
Ана капиталы программасы 2030 елга кадәр озайтылды.

Үзенең бер чыгышында Рөстәм Миңнеханов Россиядә үсеп килүче буынны традицион кыйммәтләр нигезендә тәрбияләү өчен барлык шартлар тудырылуны да билгеләп үткән иде. 

–  Шул максаттан өч ел элек «Алдынгылар хәрәкәте» гомумроссия балалар һәм яшьләр хәрәкәте оештырылды. Аның күзәтү советын Россия Президенты Владимир Путин җитәкли. «Татарстанда балалар белән эш кечкенәдән – балалар бакчасыннан ук алып барыла, анда педагоглар һәм ата-аналар җәлеп ителгән. Моннан тыш, бүген яшьләр белән «Сәләт», «Йолдызлык» төбәк иҗтимагый берләшмәләре, яшьләр дипломатиясе академиясе, студентлар хезмәт отрядлары актив эшчәнлек алып бара, – диде Татарстан Рәисе.