Бәрелештә һәлак булган Татарстан Герое Сергей Чебневның гәүдәсен тапканнар

"Аның гәүдәсен таптылар һәм колония районындагы бина җимерекләре астыннан чыгардылар", - диелә ТАСС агентлыгы хәбәрендә.
Хәрбинең тол хатыны Ольгага иренең гәүдәсе табылуы турында хәбәр ителгән.

Сергей Чебнев 1979 елның 6 мартында Балык Бистәсендә туган. Казан югары танк команда училищесын тәмамлаган. 2020 елда подполковник дәрәҗәсендә запаска киткән. Махсус хәрби операция башлангач, үзе үк хәрби комиссариатка килгән һәм мобилизацияләнгән. Батальонны җитәкләгән һәм Донецк Халык Республикасы, Луганск Халык Республикасы һәм Харьков өлкәсендә хәрби бурычларны үтәгән.

2022 елда Суворов медале, 2023 елда-«Батырлык өчен» медале, 2024 елда — Батырлык ордены белән бүләкләнгән.

Россия Герое исеме Чебневка узган елның августында Курск өлкәсендә күрсәткән батырлыгы өчен бирелгән. Подполковник 12 көн буе Кече Локня җирлеге оборонасы белән җитәкчелек иткән, Суджа янында позицияләрен тоткан. Төрле буйсынудагы өч полкның шәхси составы белән командалык иткән, сакланучы объектларны дошман юлында басып алынмас крепостька әйләндергән, каршы якны Курск АЭСына үтеп керүгә каршы төшкән.

18 августта Украина Кораллы Көчләре Хаймерс артиллерия ракета комплексы Кече Локняга һөҗүм иткән, оборона территориясе тылына десант төшерелә. Каршы якка ныгырга һәм подразделениеләрне камап алырга ирек бирмәс өчен, Сергей Чебнев штурм группасын үзе җитәкләргә булган. Бәрелеш вакытында төркем минометлар һәм дрон-камикадзе һөҗүмнәре астына эләккән, һәм подполковник үлем ярасы алган. Сугышчыларның батырлыгы һәм Чебневның төгәл гамәлләре каршы як хәрбиләренең һөҗүмен тоткарлаган, РФ Хәрби Көчләренә резервларны күчерү мөмкинлеген тәэмин иткән.

6 мартта, Чебнев туган көнендә, Россия Президенты Владимир Путин аның хатыны белән очрашкан һәм аңа «Алтын Йолдыз» медален тапшырган.