Биләрдә «Сәләт» форумының юбилей сменасы старт алды

Быел «Сәләт» җыенына – 30, ә Биләр форумнарына 15 ел тула.

Форум Россиянең төрле төбәкләреннән һәм Татарстанның барлык районнарыннан килгән 800гә якын сәләтле баланы берләштерде. Катнашучылар – «Раушан», «Биләр каласы», «Гайрәт», «Азнакай», «Рухият» һәм «Саба» профильле җәйге аланнарында сайлап алу узган балалар.

Смена кысаларында белем бирү программалары, иҗади һәм спорт чаралары, остаханәләр, экспертлар белән очрашулар үткәреләчәк. Шулай ук педагоглар өчен «Остаз» уку-укыту программасы һәм «Асыл гаилә җыены» проекты да оештырылачак.

Форум Татарстан Республикасы Хөкүмәте һәм Татарстан Яшьләр эшләре министрлыгы ярдәме белән уза.