#Кыскача яңалыклар 27 март 2025, 21:17

«Без әлегә кадәр аларның шалтыратуларын көтәбез...»

27 март 2025, 21:17

Мисырда, Хургада курорты янында, ярдан бер чакрым ераклыкта Россиянең 45 гражданы утырган «Синдбад» батискафы баткан. Фаҗига нәтиҗәсендә якынча җиде кеше һәлак булган.

Скопировать ссылку

Баштарак алар арасында Татарстаннан Кристина һәм Равил Вәлиуллиннар да бар дигән хәбәр чыкты. Әмма соңгы мәгълүматлар буенча, Кристина исән булырга мөмкин. Рәсми мәгълүмат ачыклана.
Алар икесе дә табиблар: 38 яшьлек Кристина педиатр, ә 40 яшьлек Равил - анестезиолог. Алар Мисырга 21 мартта ике кызлары: 15 яшьлек Лиана һәм 5 яшьлек Наилә белән бергә барганнар. Кызлары әлегә хастаханәдә.
Гаилә ялдан 1 апрельдә кайтырга җыенган. 27 март иртәсендә су асты экскурсиясе алдыннан Вәлиулиннар якыннары белән элемтәгә кергән. Бу хакта KP.RU га Равилнең әтисе сөйләгән.
- Алар сәяхәт итәргә яраталар, һәр елны кая да булса баралар иде. Бу юлы Мисырга киттеләр. Без балалар белән көн саен сөйләштек, алар ялдан бик канәгать иделәр. Бүген иртән дә шалтыратыштык, аларның барысы да яхшы иде. Бергәләшеп су асты экскурсиясенә барабыз, диделәр. Кызларына балык күрсәтергә теләделәр. Төшке ашка кайтып җитеп, яңадан шалтыратырга вәгъдә иттеләр... Без әлегә кадәр аларның шалтыратуларын көтәбез...

Равилнең әти-әнисе фаҗига турында яңалыклардан белгән.

Кызыклы яңалыкларны күзәтеп бару өчен безнең МАХ каналына кушылыгыз.