Быел Гырон Быдтон кая уза?

Язгы-кыр эшләре тәмамлануга багышланган удмуртларның милли бәйрәм 27 июнь үткәрелә. Сәхнәдә удмурт эстрадасы йолдызлары, Татарстан һәм Удмуртиядән 28 үзешчән фольклор  коллективның чыгышы, милли ризыклар һәм уеннар көтелә.

– Милли бәйрәм, беренче чиратта, безнең белән бер җирдә яшәүче халыкның гореф-гадәтләре, мәдәнияте, теле белән танышу. Иң мөһиме – бу байлыкны, тарихны үсеп килүче буынга тапшыру. Шунысы мөһим, нәкъ менә шундый милли бәйрәмнәр республикабызда яшәүче халыкларның бердәмлеген күрсәтә һәм уртак традицияләребезне күрсәтә. Гырон Быдтон Сабантуйга бик охшаган, – ди мәдәният министры урынбасары Дамир Нотфуллин.

Мамадыш районы бу бәйрәмне инде икенче тапкыр кабул итә. 2019 елда да Гырон Быдтон биредә узган. Мамадыш районы мәдәният бүлеге башлыгы Степан Спиридонов сүзләренчә, район кунакларны каршы алырга әзер.

– Безнең районда 40 меңгә якын кеше яши, аларның якынча 2 проценты – удмуртлар. Районда өч удмурт авылы бар. Алай булса да, удмуртлар гореф-гадәтләрен саклап, буыннан-буынга күчереп яшиләр. Бәйрәмгә барысын да әзерләп бетердек диярлек. Республикакүләм чарага күрше төбәкләрдән дә киләчәкләр. Киров өлкәсе, Башкортстан республикасыннан кунаклар көтәбез, – дип белдерде ул.

Быел беренче тапкыр бәйрәмнең ачылу тантанасында театральләштерелгән тамаша куелычак. “Ваньмыз ву бордын” ( Барысы да судан килә) дип исемләнгән тамаша удмурт мифологиясенә нигезләнә.

– Прологны җирле үзешчәннәр белән бергә әзерлибез. Җирлектә удмуртлар саны аз булса да, алар тарихны, шушы җирлеккә хас йолаларны саклап калганнар. Су темасы удмурт мифологиясендә бик ачык сурәтләнә. Бәйрәмнең үткәрелү урыны да һәрьяклап су белән әйләндереп алынган диярлек. Әзерлек эшләрен башлагач, безнең репетицияләрне кондыз да күзәтүенә тап булдык. Кондызлар куркак хайваннар. Ә монысы, киресенчә, җырлар тыңлар өчен яр буена чыга. Димәк, җирлектәге хайваннар, табигатьтә безне кабул итә, – ди Гырон Быдтон бәйрәменең режиссеры Павел Александров.

Бәйрәм кысаларында “Удмурт чеберина”, “Удмурт Батыр” (удмурт чибәре һәм батыры), “Шудо-буро удмурт семья”( удмурт гаиләләре конкурсы) һәм “Арган кырза” гармунчылар бәйгесе узачак. дмурт чибәре һәм батыры, удмурт гаиләләре һәм гармунчылар бәйгесе дә узачак.