Данлыклы көрәшче Иван дәдәй Бәширов вафат

Узган гасырның иң танылган батырларыннан берсе Иван дәдәй Бәширов иртәгә туган авылында – Питрәч районы Кибәче авылында җирләнәчәк. 

Иван Алексеевич Бәширов 1936 елда туган һәм Кибәче авылында үскән. Физик яктан бик көчле, сәләтле һәм талантлы кеше яшьтән үк милли көрәш белән шөгыльләнә башлый. Казан авыл хуҗалыгы институтында укыганда ирекле көрәш серләренә төшенә башлый һәм бу төр буенча СССРның спорт мастеры була. Иван Бәширов - ике тапкыр Россия чемпионы (1961, 1962), өч тапкыр Татарстан чемпионы (1962 , 1963, 1966), күп тапкырлар Казан, Питрәч Сабантуйларының баш батыры. 30 елдан артык «Татмолпром» берләшмәсе автобазасы җитәкчесе булган. 1992 елдан ул Татарстанның атказанган авыл хуҗалыгы хезмәткәре, 1997 елда аңа Татарстанның атказанган спорт мастеры исеме бирелде.