Дәүләт Думасында 50 ел никахта яшәгән парларга 20 мең сум федераль түләү кертергә тәкъдим иттеләр

Әлеге башлангыч белән "Аналар советы" рәисе, Дәүләт Думасы депутаты Татьяна Буцкая чыкты.

Депутатның Россия Хезмәт һәм социаль яклау министры Антон Котяков исеменә юллаган мөрәҗәгате турында РИА Новости яза.

Документта Россиянең барлык төбәкләре өчен бердәм тәртип булдыру тәкъдим ителә. Аның нигезендә, алтын туйларын 50 еллык никах юбилеен билгеләп үтүче гаиләләргә кимендә 20 мең сум күләмендә бер тапкыр бирелә торган түләү каралырга тиеш. Моннан тыш, киләсе юбилей даталары уңаеннан түләү күләмен индексацияләү яки пропорциональ рәвештә арттыру мөмкинлеге дә сакланырга тиеш, диелә мөрәҗәгатьтә.

Татьяна Буцкая билгеләп үткәнчә, Россиянең кайбер төбәкләрендә мондый ярдәм чаралары инде гамәлдә. Әмма бүгенге көндә түләүләрнең күләме һәм аларны алу шартлары төбәктән төбәккә нык аерыла.

Депутат фикеренчә, озак еллар дәвам иткән рәсми никах – ул гаиләнең шәхси казанышы гына түгел, ә җәмгыять өчен дә мөһим кыйммәт.

– Озак вакыт сакланган рәсми никах тотрыклылыкның, үзара хөрмәтнең, ярдәмләшүнең һәм традицион гаилә кыйммәтләрен саклауның ачык мисалы булып тора, – диелә мөрәҗәгатьтә.

Буцкая сүзләренчә, ил күләмендә бердәм түләү кертү гаилә институтын ныгытуга, озак еллар бергә гомер иткән парларга җәмгыятьтә хөрмәтне арттыруга һәм Россиядә гаилә кыйммәтләренә дәүләт ярдәменең бердәм механизмын булдыруга ярдәм итәчәк.

Әлегә тәкъдим каралу стадиясендә генә. Федераль дәрәҗәдә мондый түләү кертү турында рәсми карар кабул ителмәгән.