Дәүләт Думасында бала туганнан соң әтиләр өчен ял кертергә тәкъдим иттеләр

Бу хакта РИА Новости яза.
Закон проекты белән РФ Хезмәт кодексының 255 маддәсен (йөклелек һәм бала табу буенча отпуск) яңа кушымта белән тулыландырырга тәкъдим ителә.
"Хезмәткәрләргә (әтиләргә, опекуннарга) аларның гаризасы буенча бала туган очракта ундүрт календарь көн дәвам иткән өстәмә түләүле отпуск бирелә", - диелгән федераль закон проектында.

Закон проектына аңлатма язуында билгеләп үтелгәнчә, бала туганнан соң ук әти кеше өчен махсус, гарантияле һәм түләүле отпуск булмау гаиләгә ярдәм итү системасында зур бушлык булып тора. Чөнки яңа туган сабыйның тормышының беренче атналары һәм әнисенең сәламәтлеген торгызу гаилә өчен гаять мөһим һәм югары йөкләнеш чоры булып тора.

"Бу кискен чорда әти кешенең физик һәм эмоциональ ярдәме бәяләп бетергесез, әмма икътисади фикерләр еш кына әтиләрне бала тугач ук эшкә кайтырга мәҗбүр итә, гаиләне кирәкле ярдәмнән мәхрүм итә", - диелә документта.

Инициатива авторы фикеренчә, закон проектын кабул итү бала туганнан соңгы чорда яшь гаиләләргә комплекслы ярдәм күрсәтүне тәэмин итәчәк, әнине иң катлаулы һәм авыр чорда көнкүреш һәм физик мәшәкатьләрдән азат итәргә, аңа турыдан — туры физик ярдәм һәм гаилә башлыгы ягыннан мораль ярдәм күрсәтергә мөмкинлек бирәчәк. Бу хатын-кызның бала тапканнан соң уңышлы тернәкләнүе, бала тапканнан соң депрессияне профилактикалау һәм имезүне нәтиҗәле җайга салу өчен принципиаль әһәмияткә ия.

"Закон проекты әти белән бала арасында ныклы эмоциональ бәйләнешне иртә формалаштыру өчен, шулай ук әтине яңа туган сабыйны тәрбияләүгә актив җәлеп итү өчен кирәкле хокукый шартлар тудырачак. Мондый җәлеп итү гаилә бәйләнешләрен ныгытуга, җаваплы ата булу культурасын формалаштыруга һәм гаилә мөнәсәбәтләренең тигез хокуклы моделен төзүгә ярдәм итә",-дип саный Дәүләт Думасы вице-спикеры.

Аның сүзләренчә, инициатива иң җаваплы вакытта дәүләт ярдәме чараларын киңәйтү хисабына балалар туу турындагы карарның җәлеп итүчәнлеген арттырачак, бу турыдан-туры милли демографик максатларга ирешүгә ярдәм итәчәк.