Энергетиклар сатуны тыю турындагы кагыйдәне бозган гражданнарга күпме штраф салачаклар?

Җиденче чакырылыш Татарстан Дәүләт Советының унҗиденче утырышында депутатлар мәгариф, медицина, мәдәни һәм спорт учреждениеләре территориясендә, шулай ук мәдәни һәм спорт чаралары барышында энергетиклар сатуны тыю турындагы закон проектын өченче һәм соңгы укылышта кабул иттеләр.

Кагыйдә бозган гражданнарга - 3 мең сумнан 5 мең сумга, вазыйфаи затларга - 30 мең сумнан 50 мең сумга, юридик затларга 100 мең сумнан 150 мең сумга кадәр штраф каралган.

- Эчемлек составына нәрсә керүен без белмибез. Бу хакта җитештерүчеләр генә белә, алар анда "физик чыдамлылык, күнегүләр вакытында мускул массасын үстерү мөмкинлеге, витаминнар, имтиханнар тапшыру, эйфориягә алу мөмкинлеге" дип белдерә. Бу күңел ачулар эчемлеге. Чынлыкта исә энергетиклар югары процентлы кредит кебек. Алар иртәге көн энергиясен бурычка ала, һәм моннан йөрәк-кан тамырлары авырулары, неврологик һәм психик тайпылышлар килеп чыга, йокы бозыла һәм өлгереш дәәрәҗәсе кими. Бу укытучыларда һәм ата-аналарда борчу тудыра, - дип сөйләде депутат документ белән таныштырганда.