Эшләүче пенсионерларның пенсия хисабы үзгәрде. Аның тәртибен аңлатабыз

Бу чара 2016 елдан бирле туктатылган иде. 2024 елның 8 июлендә имзаланган 173нче номерлы Федераль канун нигезендә, эшләүче пенсионерларның пенсияләре ел саен алдагы елның инфляция дәрәҗәсенә кадәр артачак. Беренче арту 2025 елның 1 гыйнварыннан булган һәм 9,5 процент тәшкил иткән.
Россиянең социаль фонды хәбәр иткәнчә, индексацияне яңарту процессы автомат рәвештә гамәлгә ашырылачак. Гражданнарга нинди дә булса инстанцияләргә мөрәҗәгать итәргә кирәк булмаячак.

Эшләүче пенсионерлар – пенсия яшенә җиткән, әмма эшләүләрен дәвам итүче гражданнар. Әгәр пенсионер хезмәт яки гражданлык–хокукый килешү буенча эшләсә һәм аның эш бирүчесе Социаль Фондка акча күчерсә, ул эшләүче пенсионер булып санала. Әмма үзмәшгульләр андый хокукка ия була алмый, чөнки иминият взносларын түләмиләр.

Россия Социаль фонды мәгълүматлары буенча, 2024 елның 1 ноябренә илдә 41 миллионнан артык пенсионер исәпләнә, шуларның 8 миллионга якыны эшли. Шул вакытка пенсиянең уртача күләме 21 082,62 сум тәшкил иткән, эшләүче пенсионерлар уртача 18 483,38 сум акча алган.

Эшләүче пенсионер ике төрле пенсия алырга хокуклы: картлык буенча иминият пенсиясе һәм тупланма пенсия. Иминият пенсиясе хезмәт хокуклары нигезендә формалаша һәм дәүләттән билгеләнгән өстәмә түләүне үз эченә ала. Аны билгеләү өчен төгәл бер яшькә (хатын — кызлар өчен 58 яшь һәм ир-атлар өчен 63 яшь) җитәргә, кимендә аларның 15 ел иминият стажы һәм 28,2 пенсия коэффициенты булырга тиеш (2025 елда-30 коэффициент).

Эшләүче пенсионерлар өчен пенсиянең беркетелгән (фиксированная) өлешен индексацияләү 2016 елдан бирле үткәрелмәгән.   Пенсиянең иминият өлеше эш бирүче түләүләреннән тупланган пенсия баллары нигезендә ел саен арта. Социаль фонд иминият өлешен автомат рәвештә яңадан саный, пенсионерларга  гариза бирү кирәкми. Бер ел эчендә өстәмә түләү өч пенсия коэффициентыннан артмаска тиеш.

Эшләүче пенсионерлар шулай ук тупланма пенсия алырга хокуклы, ул тупланма өлештән һәм эш бирүченең түләүләреннән формалаша. Мондый пенсия алу хокукы: хатын — кызлар өчен — 55 яшьтән, ирләр өчен-60 яшьтән билгеләнә.

Тупланма пенсиягә хокуклы төркемнәр:
  • 1967 елгы һәм аннан яшьрәк гражданнар.
  • 2002 елдан 2004 елга кадәр взнослар түләнгән 1953-1966 елгы ир-атлар һәм 1957-1966 елгы хатын-кызлар.
  • Тупланма пенсиягә өстәмә иминият кертемнәре түләүче гражданнар.
  • Пенсия тупланмаларын формалаштыру өчен ана капиталын кулланучылар.

Айлык түләү күләмен исәпләү өчен, пенсия тупланмаларының гомуми суммасын 2024 елда 264 айга бүләләр, ә 2025 елда бу чор 270 айга кадәр арта.