Фәрит Мөхәммәтшин: «Безнең бурыч — ил парламентында Татарстанның лаеклы вәкиллеген тәэмин итү»

Очрашуда республикада социаль әһәмиятле чараларда милли-мәдәни автономияләрнең роле, шулай ук Бердәм тавыш бирү көнендә гражданнарның сайлау хокукларын гамәлгә ашыру мәсьәләләре турында фикер алыштылар.

Фәрит Мөхәммәтшин Татарстанда яшәүче 175 милләт вәкиленең дә тавышы демократик механизмнар аша ишетелүе мөһим булуын ассызыклады. Аның сүзләренчә, милли-мәдәни берләшмәләр сайлаулар турында халыкка мәгълүмат җиткерүдә һәм гражданнарның актив позициясен формалаштыруда зур роль уйный.

«Безнең бурыч — ил парламентында Татарстанның лаеклы вәкиллеген тәэмин итү. Бу республика мәнфәгатьләрен нәтиҗәле яклауга һәм татарстанлыларның тормыш сыйфатын күтәрүгә турыдан-туры йогынты ясый», — диде ул.

Исегезгә төшерәбез: Бердәм тавыш бирү көне 18, 19 һәм 20 сентябрьдә узачак. Бу көннәрдә РФ Дәүләт Думасына депутатлар, Биектау бер мандатлы сайлау округы буенча Татарстан Дәүләт Советына өстәмә депутат, шулай ук муниципаль берәмлекләрнең вәкиллекле органнарына депутатлар сайланачак.