Фатирда 15 эт һәм мәче асрау тыела. Яңа канун кабул ителерме?

Дәүләт Думасы 2026 елның гыйнварында фатирларда этләрнең һәм мәчеләрнең чикле санын торак мәйданына карап билгеләргә тәкъдим иткән закон проектын беренче укылышта карый ала, дип хәбәр итә РИА Новости.

Инициативаны Дәүләт Думасы депутаты Евгений Марченко керткән. Документ «Хайваннар белән җаваплы эш итү һәм Россиянең аерым закон актларына үзгәрешләр кертү турында»гы законга үзгәрешләр кертүне күздә тота.

«Закон проектын Дәүләт Думасы тарафыннан беренче укылышта карауга әзерләү вакытын – 2026 елның гыйнварын билгеләргә», – диелгән документта.

Проект белән бер олы эткә яки бер олы мәчегә торак урынның гомуми мәйданының 18 квадрат метр нормативын беркетү тәкъдим ителә. Норма Россиянең бөтен территориясендә кулланылырга тиеш, шул ук вакытта төбәкләргә җирле үзенчәлекләрне исәпкә алып, өстәмә, катгыйрак таләпләр кертү мөмкинлеге саклана.

Проектта шулай ук искәрмәләр дә каралган: песи яки эт баласы алты айга җиткәнче, лимитларны вакытлыча арттыру рөхсәт ителә. Озата йөрүче этләр өчен аерым искәрмә әйтелә.

Инициатива авторы фикеренчә, бердәм стандартлар күпфатирлы йортларда күршеләр арасындагы конфликтлар санын киметергә һәм йорт хайваннарын тотканда санитар-эпидемиологик таләпләрне үтәүне тәэмин итәргә ярдәм итәчәк.