Гонконг гриппы аркасында чукрак калырга мөмкинме?

Бу хакта Татарстан Сәламәтлек саклау министрлыгының баш штаттан тыш эпидемиологы Дмитрий Лопушов хәбәр итте. - Отит, ягъни эчке колак ялкынсынуы барлыкка килергә мөмкин, әмма бу очракта ишетү сәләтенең кимүе вакытлыча гына була, – дип ассызыклады белгеч. Дмитрий Лопушов әйтүенчә, табиблар H3N2 штаммы өчен хас булган ниндидер үзенчәлекле симптомнарны яки массакүләм авыр өзлегүләр теркәми.

Авыру, гадәттәгечә, классик грипп билгеләре белән уза. Искәртеп узабыз, ОРВИдан аермалы буларак, грипп кискен башлана, югары температура (39 градустан югары), баш авыртуы, буыннар сызлавы белән үрелеп бара. Табиблар халыкка профилактика чараларын үтәүне, кеше күп җыелган урыннарда һәм медицина учреждениеләрендә битлек киеп йөрүне, ә тән температурасы 40 градустан югары булган очракта ашыгыч медицина ярдәме чакыру киңәш ителә. Искәртеп узабыз, Татарстанда грипп һәм кискен респиратор вируслы инфекцияләр белән авыручылар саны арту күзәтелә.

Эпидемик чиктән 11 процентка арту күзәтелә. Шул ук вакытта эпидемиологик вазгыять тотрыклы дип бәяләнә. Узган елда бу чорда күрсәткечләр күпкә югарырак булган. Белгечләр фикеренчә, Яңа ел каникуллары чорында коллективларның таркалуы аркасында чирләүчеләр саны кимүгә таба булачак. Хәзерге вакытта барлык медицина учреждениеләрендә маска режимы кертелгән. Медицина хезмәткәрләре һәм медицина оешмаларына килүчеләр битлекләр кулланырга тиеш. Шулай ук биналарны ешрак җыештыру, даими җилләтү һәм бактерицид нурландыргычлар куллану каралган.