“Һәр ялда бер районга барып, ял итеп, тәмле ашап кайтырга була”

– Һәр ялларда кайсы да булса бер районга барып, андагы объектларны күреп һәм тәмле ашап кайтырга була. Шул исәптән Тәтеш районында да. Табигате белән дә, эчтәлекле экскурсия программалары белән дә җәлеп итә ул.  Балык тоту тарихы музее үзе генә дә ни тора. Анда шулай ук балыкның да нинди генә төрен тәкъдим итмиләр, – дип, Тәтешкә барып кайтырга чакырды ул.  

Икенче кызыклы урын – сәнәгать туризмы үзәге булган Кукмара. Соңгы елларда ул туристларны бакыр тавы белән дә җәлеп итә. Сергей Иванов күптән түгел генә Мәчкәрә авылында төзекләндерүдән соң ачылган Мәчкәрә авылы мәчетен дә искә алды. Билгеле булганча, ул авыл җирендә кирпечтән салынган иң борынгы мәчетләрнең берсе. Мәчет 1791 елда ук төзелгән. 

Кама Тамагы районы табигате белән генә түгел, виноград кырлары һәм тәмле француз сырлары белән данлыклы. Шулай ук Юрьев мәгарәсе белән дә билгеле. 
Саба районында үзенчәлекле дендрарий бар. Андагы Урман музее да кызыклы булачак. 
Казаннан ерак түгел Идел-Кама тыюлыгын да барып күрергә чакырды спикер. Аннан кайтуышлый 100 еллык тарихы булган Казан университеты обсерваториясенә дә кереп чыгарга киңәш итте.  

Алексеевскида, Биектауның Ямаширмә авылында страуслар фермасын, Балык Бистәсендә боланнар һәм мараллар фермасын карап кайтырга була. 
Сүз уңаеннан: Татарстан Рәисе Рөстәм Миңнеханов тәкъдиме белән 1 июньнән «Татарстанда җәй» программасы старт алды.