Яшь йолдызлар бүләк иткән «СалаваTik» проектына 5 ел

 «СалаваTik» төркеме – мәктәпкәчә яшьтәге балалар һәм башлангыч мәктәп укучылары өчен заманча музыкаль проект. Аның төп бурычы — музыкаль формат аша балаларның туган телгә кызыксынуын арттыру, сөйләм культурасын баету һәм милли мохиттә дөньяны танып белү өчен уңайлы шартлар тудыру.

Сәламләү өчен сүз «Адымнар» мәктәбе директоры Айдар Шәмсетдиновга бирелде:

— Татар балаларына татарча җырлар, биюләр бик кирәк. Без рәхәтләнеп бу проект жырларын тыңлыйбыз. Эшләрегезне армый-талмый башкарыгыз! – дигән теләкләрен җиткерде ул. 

«СалаваTik» проекты Татарстан Республикасы Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән тормышка ашырыла. Проектның идея авторы – «Татмедиа» АҖ генераль директоры Шамил Садыйков, проектның җитәкчесе – Зилә Фәйзуллина.

Чара дәверендә сабыйлар үзләренең сәләтләрен җыр-бию аша күрсәттеләр. Бәйрәм кысаларында «СалаваTik» проекты өстендә тырышып эшләүчеләрне рәхмәт хатлары белән бүләкләделәр. Төп тамашачылар – 1нче сыйныф укучылары һәм катнашучыларның әти-әниләре. 

— Безнең гажәеп яшь артистларыбызны тәрбияләп үстергән әти-әниләргә рәхмәтемне әйтәсем килә. Сезнең ярдәмегез булмаса, яшь буын татар моңын, татарның сүзен бөтен дөньяга тарата алмас иде. Мин сезнең алдыгызда баш иям! — диде «Салават күпере» журналы редакциясе җитәкчесе, язучы Зиннур Хөснияр.

Моннан 5 ел элек проект 6 бала белән генә башланган булса, бүгенге көндә ул 15 яшь артистны берләштерә. Бу вакыт эчендә «СалаваTik» 93 җыр һәм видеоклип чыгарган, социаль челтәрләрдә 8,5 миллионнан артык карау җыйган, проектның составы инде 3 тапкыр үзгәрергә өлгергән. 

Чараның мөхтәрәм кунаклары — «Татмедиа» республика матбугат һәм массакүләм коммуникацияләр агентлыгы җитәкчесе Айдар Сәлимгәрәев һәм «Татмедиа» АҖ генераль директоры Шамил Садыйков проектны тормышка ашыручы һәрбер кешегә зур рәхмәтләрен белдерделәр. 

Проектка балаларның һәм ата-аналарның кызыксынуы елдан-ел арта барган. Шул сәбәпле, «Салаватик» булырга теләүче балалар саны да күбәйгән. Махсус студиягә ихтыяҗ тугач, 2025 елда «Салаватик» балалар студиясе ачылган.

Бәйрәмдә тамашачыларны проектның яңа составы белән дә таныштырдылар. Шунысы кызык: һәр балага үз холкына туры килгән костюмнар сайланган. 

— Татар җырларын «СалаваTik»ларга кадәр башкаручы балалар төркеме юк иде. Безнең төп бурыч – татар балаларын җыеп, аларны туган телебездә, татар мохитендә тәрбияләү. Бу проектның максаты – артист булып чыгыш ясау гына түгел, ә туган илебезгә, иҗатка, яхшылыкка омтылу да, — диде проектның җитәкчесе Зилә Фәйзуллина.

Бәйрәм чарасы юбилей тортындагы шәмнәрне өрү белән тәмамланды. Алда проектны яңа җырлар, зур сәхнәләр һәм нәни йолдызлар көтә.

Залинә Гыйлаҗиева