Яшендә телефон куркынычмы?

Иминлек буенча эксперт Алексей Ефремов кәрәзле телефоннарны яшенле давыл вакытында кулда тоту куркыныч дигән фикергә үз җавабын бирде. Баксаң, бу кагыйдә чыбыклы телефоннарга кагыла, заманча элемтә җайланмаларына түгел икән. “Мобиль телефон яшенне җәлеп итми, бу – миф. Элек кешеләр давыл вакытында чыбыклы телефоннан сөйләшүдән куркалар иде,  ул чыннан да куркыныч тудырды. Чөнки чыбыклар ток үткәргеч сәләтенә ия. Ләкин заманча мобиль телефоннарга яшен куркыныч тудырмый. Аларда металл аз һәм алар яшен бәрүгә китерми”, - дип аңлатты Ефремов. 

Эксперт иң куркыныч урыннар болыннар, су яны яки ялгыз агач төпләре булуын искәртә. “Әгәр яшенле яңгыр вакытында кырда каласыз икән, паникага бирелергә кирәкми. Чокыр кебек яки түбәнлек кебек җиргә яшеренергә кирәк. Ләкин мондый урында су агымы булырга тиеш түгел. Елгалы җирләр яшенле яңгыр вакытында куркыныч җир булып санала”, -  дип аңлата белгеч. 

Ефремов аеруча балыкчыларга игътибарлы булырга кирәген әйтә. Аның сүзләренчә, балык тоту таяклары углеродлы пластиктан ясала һәм ул яшенне яхшы үткәрә. Белгеч яшенле давыл вакытында өйдәге барлык электр җайланмаларын сүндерергә киңәш итә. “Давыл вакытында барлык электр приборларын розеткалардан алырга кирәк. Бу аларны көчәнешнең кинәт күтәрелүеннән саклый һәм янып китүенә юл куймый”, - ди. Ефремов сүзләренчә, әгәр яшенле давыл вакытында руль артында калсагыз, машинада гына утырыгыз. Яшен бәргән очракта ток кузов аша үтеп тәгәрмәчләр аша җиргә китә. Мондый вакытта машинаның металл өлешләренә кагылырга ярамый.