Яшьләргә - 10 000, өлкәннәргә 50 000: көрәш бәйгесенә килегез!

9 август көнне Арча районының Яңа Кырлай авылында узачак “Ат көне” ат спорты фестивалендә татар көрәше дә оештырыла. Көрәшнең гомуми приз күләме – 668 мең сум, дип хәбәр итте журналистларга районның башкарма комитеты җитәкчесе урынбасары Ренат Гатиятов.  
Спикер билгеләп үткәнчә, көрәш ике категориядә: 2007 елгылар һәм аннан яшьрәкләр (җиде авырлык үлчәмендә) һәм икенчесе: 2007 елгыдан олыраклар өчен биш авырлык үлчәмендә уза. Яшьләр арасында һәрбер үлчәм авырлыгында беренче урын алучыларга – 10 мең, икенчегә – 6 мең, өченче һәм дүртенче урынга – 4әр мең сум булачак. Абсолют батырга – тәкә. Олылар көрәшендә һәр авырлык үлчәмендә җиңүчегә – 50 мең, икенчегә – 30 мең, өченчегә – 20 мең сум бирү каралган. Олылар арасында абсолют батырга ат бүләк ителәчәк, – дип сөйләде ул матбугат очрашуында.
Яшьләр арасындагы көрәшкә катнашырга теләүчеләр сәгать 12.00дән языла алачак. Көрәш ярышлары көндезге икедә башлана. Ә олылар сәгать 15.00дә язылып, ярыш 17.00дә старт алыр дип көтелә.