Ике кешенең гомере өзелгән фаҗига: Яңа Чишмә районында авария буенча хөкем карары чыгарылды

Бу хакта Татарстан Республикасы прокуратурасы хәбәр итте.

Фаҗига 2025 елның 10 октябрендә була. Тикшерү мәгълүматлары буенча, Opel Astra автомобиле йөртүчесе юл хәрәкәте кагыйдәләрен бозып каршы як полосага чыга һәм «Лада» автомобиле белән бәрелешә.

Кызганычка каршы, авария нәтиҗәсендә ике транспорт чарасының пассажирлары урында ук һәлак була.

Судта гаепләнүче үз гаебен тулысынча таныган һәм кылган гамәленә үкенүен белдергән.

Суд карары белән ул РФ Җинаять кодексының «саксызлык аркасында ике кешенең үлеменә китергән юл хәрәкәте кагыйдәләрен бозу» маддәсе буенча гаепле дип табылды. Аңа 1 ел 4 ай шартлы рәвештә ирегеннән мәхрүм итү җәзасы билгеләнде, шулай ук 1 елга транспорт чаралары белән идарә итү хокукыннан мәхрүм ителде.

Хөкем карары әлегә законлы көченә кермәгән.