Инфекционист Юлия Созинова: «С гепатитын маникюр аша йоктырырга мөмкин»

Хәзер бу авыруны дәвалап була, иң мөһиме – вакытында дәваланырга. Стериль шартлар үтәлмәгән маникюр яки косметология салонында да әлеге чирне йоктырырга мөмкин. Бу хакта «Татарстан Республикасында С хроник вируслы гепатитын йоктыруга һәм таратуга каршы көрәш чаралары турында» матбугат конференциясендә хәбәр иттеләр.

«Тире катламы бозылганда йогышлану килеп чыгарга мөмкин. Хәзер барысы да маникюр, педикюр ясата, шуңа күрә бу процедуралар өчен стериль булган урыннарны сайлау мөһим. Мондый төр хезмәтләрне өйдә яки инструментлар стерильләштермәгән җирдә эшләтергә ярамый. Медицина инструментлары, татуаж ясау, тырнак эшкәртү, пирсинг аша йогышлану килеп чыга ала. Маникюр ясаучыдан: "Сез бер тапкыр кулланыла торган инструмент кулланасызмы, инструментларны эшкәртәсезме?" дип сорарга уңайсызланмагыз. Чөнки бу сорау бик мөһим. Ә һава-тамчы юлы белән ул тапшырылмый. Шулай ук шәхси гигиена предметларының индивидуаль булырга тиешлеген истә тотарга кирәк һәм очраклы җенси бәйләнешләрдән качарга кирәк. Ел саен В һәм С гепатитларына маркерлар тапшырырга кирәк, алар тиз генә ачыкланмый, соңрак баш калкытырга мөмкин. Ә әлеге вирус йоктырган һәркемгә, кискен чорны булдырмас өчен, ел саен медицина тикшерүе узарга кирәк», - ди инфекционист, Республика клиник йогышлы авырулар хастаханәсенең медицина өлеше буенча баш табиб урынбасары Юлия Созинова.

Әгәр С гепатиты вирусын йоктырганнан соң кеше организмы аны мөстәкыйль рәвештә җиңә алмаган һәм вирус 6 айдан артык үрчүен дәвам итә икән, димәк, авыру хроник формага күчә. С гепатиты хроник формага уртача 4 кешенең 3есендә күчәргә мөмкин. Вирус инфекцияле кешенең канында, спермасында, аналык бүлендекләрендә һәм башка биологик сыеклыкларында күп күләмдә була.