Камал театрының яңа премьерасы «Туган Батыр»: зур сәхнәдә беренче гаилә спектакле булачак

“Туган Батыр” гаилә спектале булачак. Моңа кадәр балалар өчен куела торган әсәрләр кече сәхнәләрдә генә уйналса, бу юлы зур залга чыгарганнар. 3-4 июльдә булачак әлеге премьерага инде билетлар сатылып беткән диярлек. Бу хакта “Татар информ” агентлыгында узган матбугат очрашуында әйттеләр.

Әлеге спектакль Зөлфәт Хәкимнең әсәренә нигезләнеп эшләнгән. Рүзәл Мөхәммәтшин белдергәнчә, аңа бик күп халык әкиятләрен укырга, әсәрне кат-кат эшләргә туры килгән. Режиссер Айдар Җаббаров Рүзәл Мөхәммәтшинга “Туган Батыр”га багышланган унлап әсәр иҗат итәргә туры килде дип белдерде. “Бер исемдәге әллә ничә әсәрдән торган эшләрен бер китап басылырлык булды”, – ди Айдар Җаббаров.

Спектакльгә көйне Рүзәл Мөхәммәтшин сүзләренә Эльмир Низамов язган. Айдар Җаббаров бу җырларның һәркайсы хит булырга мөмкин булуын да ассызыклап узды. “Бүген театр цифрлы экраннар белән көндәшлек итә. Яшүсмерләр, яшьләр театрга кисен өчен, безгә ныклы эш алып барырга, сәхнә куелышын экраннарда варган вакыйгалардан матуррак та, баерак итеп итәргә кирәк”, – ди Камал театры җитәкчесе Илгиз Зәйниев. Шуңа да проект өстендә озаклап эшләгәннәр. Әсәрне 1 июнь көнендә үк сәхнәгә чыгарырга тиеш булганнар. Әмма үзгәрешләр кертә-кертә бу эш тоткарланган. “Туган батыр”  Камал театрында иң кыйммәтле спектакльләрнең берсе булырга мөмкин, аңа зур суммада акчалар салынды, ди әлеге эшнең үзәгендә кайнаучылар. Белгечләрне дә читтән чакырганнар. Ә артистларга килгәндә, сәхнәгә беренче адымнарын атлаучы яшьләргә өстенлек бирелгән. Өлкән буыннардан бары Алсу Гайнуллинаны гына күреп булачак.   

"Туган Батыр" проектына нигез салучы Радик Абдрахманов анимация студиясен булдыру турында уникаль осталык үзәге булдыру уе белән дә яна. “Максатыбыз безнең республикада анимацион студия булдыру. Үзәк Универмаг белән сөйләшүләр алып барабыз. Алар белән бергә анимацион студия проектын эшләргә җыенабыз, ясалма интеллект белән эшләү буенча белгечләр өйрәтергә җыенабыз. Безгә республикада креатив индустрияләр кластерының үсүе бик мөһим. Яхшы фильмнар һәм анимация җитештерү безнең төр бурычыбыз”, – ди Радик Абдрахманов.