Казанда 1 эш урынсызга 8 вакансия бар

– Рәсми теркәлгән эш урынсызлык 0,25 процентны тәшкил итә. Шул ук вакытта 1 эш урынсызга 8 вакансия туры килә. Төзелеш, сәнәгать, мәгариф һәм фән, сәүдә, транспорт тармакларына белгечләр күпләп кирәк, – диде шәһәр Башкарма комитетының икътисади үсеш комитеты рәисе Гүзәл Минһаҗева “эшлекле дүшәмбе” киңәшмәсендә. 

Башкалада “Кадрлар” илкүләм проекты нигезендә кадрлар мәсьәләсе хәл ителә бара. Аерым категория гражданнар өстәмә һөнәрләргә укытыла. Махсус хәрби операциядә катнашкан кешеләргә, шул исәптән инвалидларга эшкә урнашуда ярдәм күрсәтелә. 

Казан вертолетлар заводының җитештерү-уку үзәге кадрлар әзерләүдә актив мәйданчыкларның берсе. Биредә белгечләр генә түгел, 800гә якын мәктәп укучысы да эшче профессияләренә өйрәнә.

“Урам” экстрим-паркында 27 июньдә Яшьләр көне билгеләп үтелә. Шәһәр Башкарма комитеты аппараты җитәкчесе урынбасары – кадрлар сәясәте идарәсе җитәкчесе Ирина Бочкова хәбәр иткәнчә, экстрим-паркта 27 июньдә 10.00 сәгатьтән 20.00 сәгатькә кадәр “Казанда карьера” мәйданчыгы эшләячәк. Анда квест рәвешендә шәһәр предприятиеләре белән танышып булачак. Яшь дизайнерлар эшчеләр өчен махсус киемнәр күрсәтә.

Быел “Казан мэриясендә стажировка” проектында 30 студент катнашкан. 

– Без мэриягә стажировкага килгән яшьләр өчен шат. Студентларның һәм мәктәп укучыларының мэриядә стажировка узу белән кызыксынуы Казанның уңышларга ирешеп эшләвенә дә бәйле. Без яшьләрдән яңа идеяләр, яңа алымнар көтәбез. Мәктәпләрне тәмамлаган яшьләргә уңышлар һәм тормышта дөрес юл сайлауларын телибез, – диде Казан шәһәре Башкарма комитеты җитәкчесе Рөстәм Гафаров.