Казанда һәм Татарстанның 16 районында яңа глэмпинглар сафка бастырылачак

Субсидияләрнең гомуми күләме 739,5 миллион сум тәшкил итә, шул исәптән: 536,4 миллион сум – федераль бюджет чаралары, ә 203,1 миллион сум – республика бюджетыннан.

«Туризм һәм кунакчыллык» илкүләм проекты кысаларында яңа объектлар Казанда һәм республиканың Баулы, Биектау, Бөгелмә, Кайбыч, Кама Тамагы, Лаеш, Мамадыш, Менделеевск, Минзәлә, Питрәч, Саба, Тукай, Түбән Кама, Югары Ослан, Яшел Үзән кебек 16 районында сафка бастырылачак.

РФ Икътисади үсеш министрлыгы хуплаган инвестицион проектларның исемлеге ТР Туризм буенча дәүләт комитеты сайтында (tourism.tatarstan.ru) урын алган. Комитет тарафыннан әлеге проектлар субсидияләр тәкъдим ителүне көйли торган гомуми таләпләргә тәңгәл килүенә карап сайлана. Моның өчен капиталь булмаган модульле урнашу чараларын корып куюга субсидияләр бирүнең төбәк тәртибе кабул ителә.

Мәгълүм булганча, 2022-2024 елларда шундый ук ярдәм чаралары кысаларында Казан һәм Татарстанның 14 районында 34 инвестицион проект гамәлгә ашырылган. Алар барлыгы 441,6 миллион сум алган. Ул объектлар кунакларны кабул итә инде.

Әйтергә кирәк, быел РФ Дәүләт Думасында Татарстан Республикасы Рәисе Рөстәм Миңнеханов тарафыннан туризм үсешенә зур өлеш кертелүен билгеләп үттеләр. РФ парламентының Туризм һәм туристлык инфраструктурасын үстерү комитеты әгъзасы Андрей Марков Татарстанга бару – үзенең зур хыялы булуы турында әйткән иде.

«Капиталь булмаган урнашу чарасы» – заводта җитештерелгән, тиз генә сафка бастырыла торган корылма. Ул туристлар ел әйләнәсе уңайлы һәм куркынычсыз шартларда вакытлыча яшәп тора ала торган контейнер тибында яки глэмпинг булырга мөмкин.

Билгеле булганча, илкүләм проектларның үтәлеше Татарстан Рәисе Рөстәм Миңнеханов тарафыннан нык контрольгә алынган.

Чыганак: Татар-информ