Казанда «Минем остазларым» конкурсында җиңүчеләрне бүләкләделәр

Конкурста Казан, Яр Чаллы, Кукмара, Яшел Үзән, Бөгелмә, Зәй, Алабуга, Баулы, Яңа Чишмә һәм Балык Бистәсе районнарыннан катнашучылар социаль әһәмияткә ия проектларын тәкъдим итте. Эшләр «Социаль җаваплылык һәм буыннар дәвамчанлыгы», «Яшьләр өчен социаль лифтлар һәм остазлык», «Сәламәт яшәү рәвеше һәм психологик иминлек», «Патриотик тәрбия һәм махсус хәрби операциядә катнашучыларга ярдәм» номинацияләрендә бәяләнде.

Бүләкләү тантанасында Дәүләт Советы Рәисе урынбасары Юрий Камалтынов остазлыкның бүген аеруча мөһим булуын билгеләп үтте. Аның сүзләренчә, остазларның төп бурычы – яшь буынга җаваплылык, туган илгә мәхәббәт һәм битараф булмау кебек кыйммәтләрне тапшыру.

Быел февральдә старт алган «Минем остазларым» проекты бүген Россиянең 65 төбәген берләштерә. Татарстанда проектка 72 остаз кушылган, алар 231 «остаз – өйрәнчек» парын булдырган. Конкурска исә 40 проект тәкъдим ителгән.