Казанда мотоциклчы һәлак булган авария гаепле Марий Эл кешесен суд көтә

Тикшерү версиясе буенча, Toyota Hilux йөртүчесе мотоциклчыга юл бирмәгән.

Татарстан прокуратурасы хәбәр иткәнчә, Марий Элда яшәүче Toyota Hilux йөртүчесе Казанның Лиственная урамында сулга борылганда өстенлеккә ия булган мотоциклны үткәрмәгән. Нәтиҗәдә автомобиль белән мотоцикл бәрелешкән.

Бәрелү вакытында Toyota Hilux автомобиленнән аерылган детальләр юлда барган тагын бер Toyota Hilux һәм KIA автомобильләренә килеп төшкән.

Мотоцикл йөртүчесе алган җәрәхәтләрдән ашыгыч ярдәм килгәнче вафат булган. Ачык чыганакларда ул 37 яшьлек ир-ат булуы күрсәтелә.

Әлеге факт буенча җинаять эше кузгатылган. Тикшерү тәмамланганнан соң материаллар судка җибәрелгән.

Хәзер Toyota Hilux йөртүчесенә юл хәрәкәте кагыйдәләрен бозу нәтиҗәсендә кеше үлеменә китергән юл-транспорт һәлакәте өчен суд алдында җавап бирергә туры киләчәк.