Казанда өч көндә 19 исерек машина йөртүче тоткарланган

Рейдлар һәм профилактик чаралар барышында инспекторлар 19 исерек машина йөртүчене ачыклаган һәм аларны шәһәр юлларыннан читләштергән.

Казан Дәүләт автоинспекциясе искәртүенчә, исерек хәлдә транспорт чарасы белән идарә иткән өчен җаваплылык көчәйтелгән. Хәзер мондый хокук бозу өчен 30 мең сумнан 45 мең сумга кадәр штраф каралган.

Югарырак штрафлар Россия Административ хокук бозулар кодексының 12.8, 12.26 һәм 12.27 маддәләрендәге «исерек» хокук бозуларга кагыла. Алар арасында:

исерек килеш автомобиль йөртү;

йөртү таныклыгы булмаган яки аннан мәхрүм ителгән затның исерек килеш транспорт чарасы белән идарә итүе;

медицина тикшерүен узудан баш тарту;

транспорт чарасын исерек кешегә тапшыру;

юл-транспорт һәлакәтеннән соң алкоголь куллану.

Дәүләт автоинспекциясе машина йөртүчеләрне юлларда җаваплы булырга чакыра.

– Исерек килеш руль артына утырмагыз. Кирәк булса, такси хезмәтеннән файдаланыгыз. Бу сезнең генә түгел, юл хәрәкәтендә катнашучы башка кешеләрнең дә гомерен һәм сәламәтлеген сакларга ярдәм итә, – дип искәртә автоинспекторлар.