Казанда “Приют человека” 41нче бушлай кайнар аш өләшү пунктын ача

Казан шәһәренең Латыш Укчылары урамы, 19 адресы буенча урнашкан “Приют человека” хәйрия проектының кайнар ашлар өләшүче 41 нче пункты үз ишекләрен 10:00 сәгатьтә ачыла. Биредә мохтаҗларга, аз керемле, өлкән яшьтәге ялгыз пенсионерларга, күп балалы гаиләләргә, инвалидларга 11-13 сәгатьләрдә (якшәмбе көненнән тыш) бушлай кайнар ризык биреләчәк. 

Әлеге ярдәм проекты Казан шәһәре башкарма комитеты һәм Татарстан Хезмәт һәм социаль яклау министрлыгы белән тыгыз элемтәдә эшли һәм пунктлар алар белән киңәшеп ачыла. Казанның Совет районының әлеге микрорайонында өлкән яшьтәге кешеләрнең күп яшәвен исәпкә алып, пункт булдырырга дигән карарга киленә.

Статистика буенча, гадәттә, килүчеләрнең 85 проценты пенсионерлар һәм өлкән яшьтәге кешеләр. Моны исәпкә алып, өлкән яшьтәге кешеләргә (65 яшьтән өлкәнрәкләр) һәм инвалидларга (1 һәм 2 төркем) шәхесләрен раслаучы документлар күрсәтү нигезендә азык-төлек җыелмалары һәм көнкүреш химиясе дә биреләчәк. Ачылышта “Могжиза” сәләматлекләре чикле балалар катнашындагы театр студиясе дә чыгыш ясар дип көтелә. 

Әлеге проект Россиянең алты төбәгендә - Татарстан, Ульяновск, Башкортстан, Удмуртия, Пенза, Мордовиядә эшләп килә. Көнгә 3600 порция кайнар ризык өләшенә. “Приют человека” хәйрия проекты, кайнар ризык белән тәэмин итүдән тыш, мөрәҗәгать итүчеләргә бушлай кием-салым бирә, шул ук вакытта психологлар, юристлар тарафыннан ярдәмнәр күрсәтелә.  

“Приют человека” хәйрия проектын 2018 елда Азат Гайнетдинов тарафыннан тормышка ашырыла. Оешма аз керемле пенсионерларга, инвалидларга, янгыннан зыян күрүчеләргә, күп балалы гаиләләргә, махсус хәрби операциядә катнашучылар гаиләләренә, яшәү урыны булмаган һәм иректән мәхрүм ителеп, төрмәдә срокларын тутырып чыккан кешеләргә һәм авыр тормыш хәлендә калган һәркемгә ярдәм күрсәтә. 8 ел эшләү дәверендә 3 миллионнан артык кайнар ризык порциясе, 300 мең тирәсе кием комплекты таратылган, 78 меңнән артык кеше вакытлыча кунарга урын бирелгән, 21 меңнән артык азык-төлек җыелмасы алган, 12 мең кеше эшкә урнаштырылган.