Казанда студент кызны эзәрлекләү: видеолардан соң җинаять эше кузгатылды

Социаль челтәрләрдә таралган видеоларда кызны яшьтәшләре кимсетә: аңа электрошокер карата кулланалар, чәченнән тартып көчләп тезләндерергә тырышалар.

Шаһитлар сүзләренчә, бу хәл беренче генә түгел — мыскыллау озак вакыт дәвам иткән. Әмма, шул видеоны чыгарган авторлар раславынча, белем йорты администрациясе тиешле чаралар күрмәгән.

Әлеге хәл турында мәгълүмат «Куркынычсыз интернет лигасы» башлыгы Екатерина Мизулинага да барып җиткән. Ул материалларны прокуратурага җибәрергә вәгъдә иткән.

Озакламый Россия Тикшерү комитеты бу факт буенча җинаять эше кузгатылуын хәбәр итте. Эшне тикшерү нәтиҗәләре ведомство рәисе Александр Бастрыкинга тәкъдим ителәчәк.

Вакыйга тирәсендә тикшерү дәвам итә, ә җәмәгатьчелек уку йортларында иминлек мәсьәләсенә игътибарны көчәйтергә чакыра.