Казанда җылыту сезонын 7 майда тәмамларга планлаштыралар

Гамәлдәге кагыйдәләр буенча, әгәр һаваның уртача тәүлеклек температурасы биш көн рәттән +8 градустан югары сакланса, җылылык бирү туктатыла. Быел яз иртәрәк җылы килү сәбәпле, коммуналь хезмәтләр дә графикны үзгәртергә мәҗбүр булды.

Җылыту сүндерелгәннән соң шәһәрдә традицион рәвештә киләсе кышка әзерлек башланачак. Казэнерго һәм Казан җылылык челтәрләре җәй дәвамында җылылык системаларын тикшерәчәк, шул исәптән гидравлик сынаулар үткәрәчәк.

Бу эшләр вакытында шәһәр халкын вакытлыча уңайсызлыклар да көтә: кайбер йортларда кайнар суны сүндереп торачаклар. Белгечләр аңлатканча, мондый чаралар торбаүткәргечләрдәге җитешсезлекләрне вакытында ачыклау һәм аларны кыш җиткәнче төзәтү өчен кирәк.

Эшләр этаплап, шәһәрнең төрле районнарында чиратлап башкарылачак, шуңа күрә кайнар су сүндерү вакыты һәр йортта аерым булачак.