Казанлылар өстәмә белем алуга елына 63 мең сумга якын акча сарыф итә

Бу хакта аналитиклар тикшеренү нәтиҗәләренә таянып хәбәр итә.

Белгечләр мәгълүматлары буенча, казанлыларның уннан алтысы мәктәп, көллият яки югары уку йортын тәмамлаганнан соң да белем алуын дәвам итә. Иң популяр юнәлешләр арасында философия һәм психология, спорт һәм сәламәтлек, шулай ук финанс өлкәсендәге курслар бар.

Сораштыруда катнашучыларның 61 проценты өстәмә белемне «үзләре өчен» — кызыксыну, яңа нәрсә өйрәнү һәм үз-үзен үстерү максаты белән ала. 65 яшьтән өлкәнрәк кешеләр арасында бу күрсәткеч тагын да югарырак — 76 процент.

Респондентларның яртысына якыны белем алуны карьера үсеше белән бәйли. Шулай ук 30 проценты заманча трендлардан артта калмас өчен укый, 19 проценты яңа һөнәр үзләштерергә тели, 16 проценты аралашу даирәсен киңәйтүне максат итеп куя.

Белгечләр фикеренчә, өзлексез белем алу хәзерге җәмгыятьтә гадәти күренешкә әверелә бара. Россиядә дә өстәмә белем хезмәтләренә ихтыяҗ арта: бер ел эчендә бу өлкәдә кызыксыну 10,4 процентка үскән.

Экспертлар билгеләп үткәнчә, яңа күнекмәләр алу кешегә хезмәт базарында көндәшлеккә сәләтле булырга, карьерасын үстерергә һәм шәхси үсеш өчен яңа мөмкинлекләр ачарга ярдәм итә.