Казанның 7нче хастаханәсендә бөерләрне күчереп утырта башладылар

Донор органын инде өч кеше алган. Бу хакта «Татар-информ» га клиниканың матбугат хезмәтендә хәбәр иткән.

«Элек безнең хастаханәдә трансплантация кебек юнәлеш бөтенләй юк иде. Башта без йөрәк белән бәйле операцияләрне үзләштердек, һәм менә ел ахырына бөерләрне күчереп утырту буенча өч операция үткәрдек. Күбрәк операциядән башлау мөмкин түгел: эш моментлары туа, аларны камилләштерергә кирәк», – дип аңлаткан органнар донорлыгын координацияләү буенча хирургия бүлеге мөдире Илдар Мусин.

Казан табибларына академик В.И. Шумаков исемендәге Трансплантология һәм ясалма органнар милли медицина тикшеренү үзәге белгечләре консультацияләр биргән. Алар операцияләрдә катнашкан һәм пациентларны өйләренә чыгарганчы күзәтергә ярдәм иткәннәр.