Казанның Юдино бистәсендә мохтаҗлар өчен бушлай кайнар аш: иртәгә 40 пункт эшли башлый

Ул Ильич урамы 21 йорт адресы буенча булачак. Яңа пункт мохтаҗларны, беренче чиратта өлкән яшьтәге кешеләрне һәм пенсионерларны көн саен кайнар аш белән тәэмин итәчәк. Әлеге пунктта көн саен 11:00 дән 13:00 сәгатькә кадәр килгән һәркемгә кайнар ризык бирелер дип көтелә. Шул ук вакытта өлкән яшьтәге кешеләргә (65 яшьтән өлкәнрәкләр) һәм инвалидларга (1 һәм 2 төркем) аз керемле булуларын раслаучы документлар нигезендә азык-төлек җыелмалары һәм көнкүреш химиясе өләшенәчәк. 

Бүгенге көндә “Приют человека” проекты Россиянең алты төбәгендә - Татарстан, Ульяновск, Башкортостан, Удмуртия, Пенза, Мордовиядә эшли.  Көн саен 3500 кеше кайнар ризык ашый. “Приют человека” хәйрия проектының башында меценат Азат Гайнетдинов тора. Иганәчеләр ярдәме белән аз керемле пенсионерларга, инвалидларга, янгыннан зыян күрүчеләргә, күп балалы гаиләләргә, махсус хәрби операциядә катнашучыларның гаиләләренә, билгеле бер яшәү урыны булмаган һәм иректән мәхрүм ителгән кешеләргә ярдәм ителә. 

8 ел эшләү дәверендә 3 миллионнан артык кайнар ризык, 300 мең кешегә  кием-салым таратылган, 78 меңнән артык кеше вакытлыча кунарга урын бирелгән, 21 меңнән артык азык-төлек җыелмасы өләшенгән. 12 мең кеше эшкә урнаштырылган.