Кимчелекләрне күрсәң, “Халык контроле”нә хәбәр җибәр

Хөкүмәт йортында үткәрелгән брифингта 2025 елда халык белән кире элемтәдә цифрлы платформаларның эшчәнлеге турында сүз барды.

– Татарстанның Сәламәтлек саклау министрлыгы тарафыннан Казанның 7нче шәһәр хастаханәсендә телемедицина белешмәләре бирү сынау рәвешендә гамәлгә куела. Мәсәлән, кешеләр үзләренең электрон “больничный”ларын читтән торып та яптыра алачак. Республикада 1,5 миллион кеше МАХны куллана инде. “Ак Барс банк” быел МАХка керергә планлаштыра. “Халык контроле”, “Халык инспекторы”, ГосУслуги РТ цифрлы платформаларына иң күп мөрәҗәгать Казаннан  керде, ул – 44,7 мең. Чаллыдан 18,3 мең мөрәҗәгать килде. Сәламәт кешеләрнең инвалидлар өчен махсус билгеләнелгән урынга автомобильләрен куеп калдыру очраклары бар. Битараф булмаган кешеләр шушындый 6,7 мең очракны “Халык инспекторы” электрон адресына җиткерде. Транспорт өлкәсенә кагылышлы кагыйдә бозуларны хәбәр иткән кешеләргә узган ел 3,7 миллион сум премия түләнде инде, – диде Татарстанның дәүләт идарәсен цифрлы үстерү, мәгълүмати технологияләр һәм элемтә министры урынбасары Булат Габдрахманов.

“Халык контроле” адресына узган ел 89 186 мөрәҗәгать кергән.

– Иң күп хәбәрләр тышкы төзекләндерүгә, юллар төзелешенә һәм торак-коммуналь хуҗалыкка кагыла. Көнкүреш калдыкларын чыгару, җәмәгать транспорты һәм экология мәсьәләләре дә күтәрелә. Мөрәҗәгатьләрнең 77-78 проценты чишелеш таба. Сорауларны районнарга чыгып та тикшерәбез, – диде Татарстан Республикасының кеше хокуклары буенча вәкаләтле Сәрия Сабурская.

Татарстан Республикасы Рәисенең гражданнар мөрәҗәгатьләре белән эшләү идарәсе җитәкчесе Роза Килькеева халык белән элемтәнең мөһимлеген искәртте. Чаллы шәһәре Башкарма комитеты җитәкчесе Фәрид Сәлахов белән Казанның Авиатөзелеш һәм Яңа Савин районнары хакимияте башлыгы Ренат Шәмсетдинов халыктан электрон рәвештә кергән мөрәҗәгатьләр кимчелекләрне тиз арада хәл итәргә булышуы турында әйттеләр.