Көймәләр сезоны ябылды, ә куркыныч башлана гына: боз өстенә чыгарга ярамый!

Бу хакта Россия Гадәттән тыш хәлләр министрлыгының Татарстан Республикасы буенча Баш идарәсе җитәкчесе урынбасары – Татарстан Республикасының кече суднолар буенча баш дәүләт инспекторы Денис Мокеев хәбәр итә.

Быелгы сезонда суда 87 фаҗигале хәл теркәлгән, 71 кеше һәлак булган. Үлемгә китергән төп сәбәпләрнең берсе – ярдан яки пирстан суга сикерү. Бу сезонда шундый 33 очрак теркәлгән. Ел башыннан кече суднолар белән бәйле 13 бәла-каза очрагы булган, сигез кеше һәлак булган. 12 кешене, шул исәптән ике баланы, коткарып калганнар.

– Суга керүнең иң куркыныч вакыты җитте, – ди Мокеев. – Боз катламы күренү белән халык боз өстенә чыгарга ашыга. Бозның калынлыгы 10 сантиметрга җитмичә, аның өстенә чыгарга ярамый. Тимераякта шуу өчен боз кимендә 12 сантиметр калынлыкта булырга тиеш. Көзге боз нык булып күренсә дә, чынлыкта ул юка була. Бу хакта балаларга аңлатырга, боз өстенә чыгуның куркыныч икәнен сөйләргә кирәк.