Концерт карап, изгелек эшләп кайтыгыз әле!

Удмуртиянең Ижау каласында яшәүче Тимировлар бүгенге көндә бер җылы сүзгә дә мохтаҗ. Олы уллары Ниязга ؘ– 9, кечкенәсе Исмаилгә 3 яшь. Икесе дә  Миодистрофия Дюшенна диагнозы белән чирли. Тимировлар ике балаларының гомере өчен көрәшә. Ике малайларында да сирәк очрый торган авыру тапканнар. Өч балалы мөселман гаиләсе Аллаһы Тәгаләнең әнә шундый зур сынавын уза. Ниязга тиз арада дәвалау уздырырга кирәк. Юкса, соң булуы бар. Тик дәвалау өчен 2,9 миллион доллар кирәк.

Нияз  авырый башлаган 2019 елда, әлеге чир дәвалап булмый торган авырулар рәтендә була. 2023 елда, Америка Кушма Штатларында Элевидис дигән препарат уйлап табалар. Авыручы кеше, бер тапкыр әлеге системаны алганнан соң, геннар үзгәрә, бала тулы канлы тормыш белән яшәү мөмкинлеге бирә. Әлеге инфузион терапияне (система) бала инвалид коляскасына утырганчы кирәк. 

Ниязның әтисенең туганы Илүзә Тимирова әйтүенчә, алар кайларга, кемнәргә генә мөрәҗәгать итмәгән. “Бары Элевидис препараты балаларның гомерен саклап калачак. Ул бер тапкыр ясала һәм геннарны үзгәртеп, балага савыгырга ярдәм итә, – ди Илүзә. – Балаларның әтисе минем бертуганым. Без – Актаныш районы кешеләре, киленебез Удмуртиядән. Туганым гаиләсе белән Ижау шәһәрендә яши”.

Бүгенге көнгә ул даруны алу өчен 283 миллион сум акча кирәк. 25 миллионы җыелган инде. Сбор тизрәк барсын өчен, алар якташлары Татарстан Республикасының атказанган артисты Лилия Муллагалиевага хәйрия концерты оештырып булмасмы дип мөрәҗәгать итә. Лилия ханым аларның бу фикерләрен хуплап алып, башка җырчыларны да әлеге изге эшкә җәлеп иткән. Тимеровларның моңа кадәр андый чараны бер тапкыр да уздырганнары юк, аның тәртибен дә белмиләр. Лилия аларга үзенең киңәшләрен бирә, билетлар сатуда булыша. “Хәлебезгә кергән якташыбыз Лилия Муллагалиевага бик зур рәхмәт, – ди Илүзә.  – Алла боерса, Казанда уза торган концертны яхшы гына оештыра алсак, шул ук вакытта нәтиҗәсе дә булса, әлеге чараны башка шәһәрләрдә дә дәвам итәргә уйлыйбыз”. 

Концертка барырга мөмкинлеге булмаганнар, әмма сабыйга ярдәм итәргә теләге булучылар 7 (912) 872-58-00 телефон номеры аша Ниязның әнисе Эльвира Миннесагыйт кызы Тимирова исеменә теркәлгән Саклык банкы, Дата Банк, Т-Банкларына акча җибәрә ала. Банклар счетны япмасыннар өчен, комментариягә “Ниязу на лечение” яки “Помощь Ниязу”, дип язарга онытмагыз.